**ಜ್ಞಾನ ಕಾರಂಜಿ**::: ಬಯಲಾಗಲಿದೆ ಭಾರತೀಯರ ಸ್ವಿಸ್ ಬಂಡವಾಳ

ಸ್ವಿಸ್ ಬ್ಯಾಂಕುಗಳಲ್ಲಿ ಭಾರತೀಯರು ಠೇವಣಿ ಇರಿಸಿರುವ ಹಣದ ಅಧಿಕೃತ ಲೆಕ್ಕಾಚಾರ ಇದುವರೆಗೆ ಲಭ್ಯ ಇಲ್ಲದೇ ಹೋದರೂ, ಎಚ್​ಎಸ್​ಬಿಸಿಯಲ್ಲಿ ಅಘೋಷಿತ ಆದಾಯ -ಠಿ;8,448 ಕೋಟಿ ಇರಬಹುದೆಂಬ ಅಂದಾಜಿದೆ. ಭಾರತೀಯರಿಗೆ ಸಂಬಂಧಿಸಿದ ಎಚ್​ಎಸ್​ಬಿಸಿ ಖಾತೆಗಳ ವಿವರವನ್ನು ಸ್ವಿಜರ್ಲೆಂಡ್ ಅಧಿಕಾರಿಗಳು ಇನ್ನು ಹತ್ತು ದಿನದೊಳಗೆ ಭಾರತ ಸರ್ಕಾರಕ್ಕೆ ಹಸ್ತಾಂತರಿಸಲಿದ್ದಾರೆ ಎಂದು ಕೇಂದ್ರ ಹಣಕಾಸು ಸಚಿವ ಪಿಯೂಷ್ ಗೋಯೆಲ್ ಮಂಗಳವಾರ ರಾಜ್ಯಸಭೆಗೆ ಪ್ರಶ್ನೋತ್ತರ ವೇಳೆಯಲ್ಲಿ ತಿಳಿಸಿದ್ದಾರೆ. ಕೇಂದ್ರದ ಬಳಿ ಇರುವ ಮಾಹಿತಿ
ಎಚ್​ಎಸ್​ಬಿಸಿ ಖಾತೆದಾರರ 2010-11 ಮತ್ತು 2011-12ರಿಂದ 2014ರ ಅವಧಿಗೆ ಸಂಬಂಧಿಸಿದ ಮಾಹಿತಿ ಬಹಿರಂಗಗೊಂಡಿದೆಯಾದರೂ, ಆ ಕುರಿತ ಹೆಚ್ಚಿನ ಮಾಹಿತಿ ಪಡೆಯುವ ಕೆಲಸಕ್ಕೆ ಸ್ವಿಜರ್ಲೆಂಡ್ ಸರ್ಕಾರ ತಡೆಯೊಡ್ಡಿತ್ತು. ಅವು ರಹಸ್ಯ ಮಾಹಿತಿ ಎಂಬ ಕಾರಣವನ್ನೂ ಅದು ನೀಡಿತ್ತು. ಬಹಿರಂಗಗೊಂಡಿರುವ ಮಾಹಿತಿ ಕಳ್ಳತನದ ಮಾರ್ಗದಲ್ಲಿ ಪಡೆದುದು ಎಂದು ಘೋಷಿಸಿತ್ತು. ಕೊನೆಗೆ, ಕೇಂದ್ರ ಕಂದಾಯ ಕಾರ್ಯದರ್ಶಿ ಸ್ವಿಜರ್ಲೆಂಡ್​ಗೆ ತೆರಳಿ ಅಲ್ಲಿ ಸರ್ಕಾರದ ಜತೆಗೆ ದ್ವಿಪಕ್ಷೀಯ ಮಾತುಕತೆ ನಡೆಸಿದರು. ಬಳಿಕ 2015ರ ಅಕ್ಟೋಬರ್ 15ರಂದು ಉಭಯ ಸರ್ಕಾರಗಳು ಜಂಟಿ ಹೇಳಿಕೆಗೆ ಸಹಿ ಹಾಕಿದವು. ಅದರಂತೆ, ಪರಸ್ಪರ ಮಾಹಿತಿ ಹಂಚಿಕೊಳ್ಳುವ ಒಪ್ಪಂದ ಏರ್ಪಟ್ಟಿದೆ. ಎಚ್​ಎಸ್​ಬಿಸಿ ಖಾತೆಗಳ ಮಾಹಿತಿಯನ್ನೂ ಪಡೆಯಲು ಅವಕಾಶವಿದೆ.
ಎಚ್​ಎಸ್​ಬಿಸಿ ಪಟ್ಟಿಯಲ್ಲೇನಿತ್ತು?
ಸಚಿವರ ಹೇಳಿಕೆ ಪ್ರಕಾರ, ಅಕ್ರಮವಾಗಿ ಬಿಡುಗಡೆಗೊಂಡಿರುವ ಎಚ್​ಎಸ್​ಬಿಸಿ ಪಟ್ಟಿ ಪ್ರಕಾರ -ಠಿ;5,447 ಕೋಟಿ ತೆರಿಗೆ ಬಾಧ್ಯತೆ ಹೊಂದಿದ -ಠಿ;8,448 ಕೋಟಿ ಅಲ್ಲಿನ ಭಾರತೀಯರ ಖಾತೆಗಳಲ್ಲಿದೆ. 164 ಪ್ರಕರಣಗಳಲ್ಲಿ -ಠಿ;1,290 ಕೋಟಿ ದಂಡ ವಿಧಿಸಲ್ಪಟ್ಟಿದೆ. 84 ಕೇಸ್​ಗಳಿಗೆ ಸಂಬಂಧಿಸಿ 199 ವಿಚಾರಣಾ ದೂರುಗಳು ದಾಖಲಾಗಿವೆ. ಪನಾಮಾ ಪೇಪರ್ಸ್​ಗೆ ಸಂಬಂಧಿಸಿ, 426 ಖಾತೆದಾರರ ವಿವರಗಳು ಲಭ್ಯವಾಗಿವೆ. ಆ ಕುರಿತು ತನಿಖೆ ಪ್ರಗತಿಯಲ್ಲಿದೆ.
ಎಚ್​ಎಸ್​ಬಿಸಿ ಪಟ್ಟಿ 1
ಸ್ವಿಜರ್ಲೆಂಡ್ ಎಚ್​ಎಸ್​ಬಿಸಿ ಬ್ಯಾಂಕ್​ನ ಜಿನೀವಾ ಶಾಖೆಯಲ್ಲಿ 2006ರಲ್ಲಿ ಸಿಕ್ಕ ಮಾಹಿತಿಯ ಪ್ರಕಾರ 628 ಭಾರತೀಯರ ಖಾತೆದಾರರ ಪಟ್ಟಿ 2011ರಲ್ಲಿ ಭಾರತಕ್ಕೆ ಲಭ್ಯವಾಗಿತ್ತು. 2006ರಲ್ಲಿ ಎಚ್​ಎಸ್​ಬಿಸಿ ಜಿನೀವಾ ಶಾಖೆಯಲ್ಲಿ ಉದ್ಯೋಗ ತ್ಯಜಿಸಿದ ವ್ಯಕ್ತಿಯ ಮೂಲಕ ಈ ಪಟ್ಟಿ ಬಹಿರಂಗವಾಗಿತ್ತು.
ಎಚ್​ಎಸ್​ಬಿಸಿ ಪಟ್ಟಿ 2
ತನಿಖಾ ಪತ್ರಕರ್ತರ ಅಂತಾರಾಷ್ಟ್ರೀಯ ಒಕ್ಕೂಟ ಮತ್ತು ಲೆ ಮಾಂಡ್ ಪತ್ರಿಕೆ ಕಾರ್ಯಾಚರಣೆ ‘ಸ್ವಿಸ್ ಲೀಕ್ಸ್’ ಮೂಲಕ 2015ರ ಆರಂಭದಲ್ಲಿ ಎಚ್​ಎಸ್​ಬಿಸಿ ಬ್ಯಾಂಕ್​ನ ಗ್ರಾಹಕರ ಪಟ್ಟಿ ಸೋರಿಕೆಯಾಗಿದೆ. ಈ ಪಟ್ಟಿಯಲ್ಲಿ ಜಗತ್ತಿನ 200ಕ್ಕೂ ಹೆಚ್ಚು ದೇಶಗಳ ಒಂದು ಲಕ್ಷಕ್ಕೂ ಅಧಿಕ ಗ್ರಾಹಕರ ಹೆಸರು, ಖಾತೆ, ದೇಶದ ವಿವರಗಳು ಇದ್ದವು.