**ಜ್ಞಾನ ಕಾರಂಜಿ**::: ಏಷಿಯನ್​ ಗೇಮ್ಸ್​ನಲ್ಲಿ ಭಾರತದ ಪದಕ ಬೇಟೆ:

ಶೂಟರ್ಸ್​ಗಳದ್ದೇ ಮೇಲುಗೈ, ಜಕಾರ್ತ(ಇಂಡೋನೇಷ್ಯಾ): ಜಕಾರ್ತದಲ್ಲಿ ನಡೆಯುತ್ತಿರುವ 18ನೇ ಏಷಿಯನ್​ ಗೇಮ್ಸ್​ನ ಮೂರನೇ ದಿನವಾದ ಇಂದು ಕೂಡ ಭಾರತ ಪದಕ ಬೇಟೆಯನ್ನು ಮುಂದುವರಿಸಿದೆ.
68 ಕೆಜಿ ಮಹಿಳಾ ಫ್ರೀಸ್ಟೈಲ್​ ಕುಸ್ತಿ ವಿಭಾಗದಲ್ಲಿ ಭಾರತದ ದಿವ್ಯ ಕಕ್ರನ್​ ಕಂಚಿನ ಪದಕವನ್ನು ಕಬಳಿಸಿದ್ದಾರೆ. ತೈಪೈನ ಚೆನ್​ ವೆಲ್ಲಿಂಗ್​ ವಿರುದ್ಧ 10-0 ಅಂಕಗಳ ಅಂತರದಲ್ಲಿ ಜಯ ಸಾಧಿಸಿ ಕಂಚಿನ ಪದಕಕ್ಕೆ ತೃಪ್ತಿಪಟ್ಟಿದ್ದಾರೆ.
ಸೆಪಕ್​​​ ತಕ್ರಾ ಪಂದ್ಯದಲ್ಲಿ ಭಾರತದ ಪುರುಷರ ರೆಗ್ಯೂ ತಂಡ ಕಂಚಿನ ಪದಕ ಜಯಿಸಿದ್ದು, ಇತಿಹಾಸದಲ್ಲೇ ಮೊದಲ ಬಾರಿಗೆ ಏಷಿಯನ್​ ಗೇಮ್ಸ್​ನಲ್ಲಿ ಈ ಸಾಧನೆ ಮಾಡಿದ್ದಾರೆ. ಸೆಪಕ್​​​ ತಕ್ರಾದಲ್ಲಿ ಪ್ರಸ್ತುತ ವಿಶ್ವ ಚಾಂಪಿಯನ್ಸ್​ ಎನಿಸಿಕೊಂಡಿರುವ ಥಾಯ್ಲೆಂಡ್ ​ ತಂಡವನ್ನು ಮಣಿಸಿ ಈ ಸಾಧನೆ ಮಾಡಿದ್ದಾರೆ.
50 ಮೀಟರ್​ ರೈಫಲ್​​ ವಿಭಾಗದಲ್ಲಿ ಭಾರತದ ಸಂಜೀವ್​ ರಜಪೂತ್ ಬೆಳ್ಳಿ ಪದಕವನ್ನು ಜಯಿಸಿದ್ದಾರೆ. 37 ವರ್ಷದ ಸಂಜೀವ್​ ಮೂರು ಸ್ಥಾನಗಳೊಂದಿಗೆ ಫೈನಲ್​​ನಲ್ಲಿ ಮುನ್ನಡೆ ಸಾಧಿಸಿದರೂ ಬೆಳ್ಳಿ ಪದಕಕಷ್ಟೇ ತೃಪ್ತಿಪಡಬೇಕಾಯಿತು.
ಬೆಳಗ್ಗೆಯಷ್ಟೇ 10 ಮೀಟರ್​ ಏರ್​ ಪಿಸ್ತೂಲ್​ ಸ್ಪರ್ಧೆಯಲ್ಲಿ 16 ವರ್ಷದ ಸೌರಭ್​ ಚೌಧರಿ ಕೂಟ ದಾಖಲೆಯೊಂದಿಗೆ ಚಿನ್ನದ ಪದಕವನ್ನು ಜಯಿಸಿದರು. ಸೌರಭ್​ ಒಟ್ಟು 240.7 ಅಂಕ ಕಲೆ ಹಾಕಿದರೆ, ಇದೇ ವಿಭಾಗದಲ್ಲಿ ಅಭಿಷೇಕ್​ ವರ್ಮಾ 219.3 ಅಂಕ ಕಲೆ ಹಾಕಿ ಕಂಚಿನ ಪದಕವನ್ನು ಕಬಳಿಸಿದರು. ಇದೇ ಸ್ಪರ್ಧೆಯಲ್ಲಿ ಜಪಾನ್​ನ ಟೋಮೋಯುಕಿ ಮಟಸುದಾ ಬೆಳ್ಳಿ ಪದಕ ಜಯಿಸಿದರು.
ಇದುವರೆಗೂ 10 ಪದಕವನ್ನು ಗೆದ್ದಿರುವ ಭಾರತ ಪದಕ ಪಟ್ಟಿಯಲ್ಲಿ 7ನೇ ಸ್ಥಾನವನ್ನು ಕಾಯ್ದುಕೊಂಡಿದೆ. 10 ರಲ್ಲಿ ಮೂರು ಚಿನ್ನ, ಮೂರು ಬೆಳ್ಳಿ ಹಾಗೂ ನಾಲ್ಕು ಕಂಚನ್ನು ತನ್ನ ಬತ್ತಳಿಕೆಗೆ ಹಾಕಿಕೊಂಡಿದೆ.