**ಜ್ಞಾನ ಕಾರಂಜಿ**::: ಇ-ಹಾಸ್ಪಿಟಲ್​ಗಿಲ್ಲ ಶುಶ್ರೂಷೆ..!,

ವಿಲಾಸ ಮೇಲಗಿರಿ, ಬೆಂಗಳೂರು
ಸರ್ಕಾರಿ ಆಸ್ಪತ್ರೆ ಎಂದರೆ ಅದಿಲ್ಲ-ಇದಿಲ್ಲ ಎಂಬ ದೂರು ಸರ್ವೆ ಸಾಮಾನ್ಯ. ಆದರೆ, ಎಲ್ಲ ಇದ್ದೂ ಕಾರ್ಯ ನಿರ್ವಹಿಸುತ್ತಿಲ್ಲ ಎಂದರೆ ಯಾರನ್ನು ದೂರಬೇಕು..?

ಇ-ಆಸ್ಪತ್ರೆ ಯೋಜನೆಯಡಿ ಪ್ರತಿ ಜಿಲ್ಲಾಸ್ಪತ್ರೆಯಲ್ಲಿ ಬರೋಬ್ಬರಿ 65 ಕಂಪ್ಯೂಟರ್/ಮಾನಿಟರ್, 10 ಟ್ಯಾಬ್, 160 ಬ್ಯಾಟರಿ, 10 ಪ್ರಿಂಟರ್, 10 ಕಂಪ್ಯೂಟರ್ ಆಪರೇಟರ್​ಗಳಿದ್ದಾರೆ. ಇಷ್ಟೆಲ್ಲ ಇದ್ದೂ ಬಳಕೆ ಆಗುತ್ತಿರುವುದು ಐದೋ ಹತ್ತೋ ಕಂಪ್ಯೂಟರ್​ಗಳು ಮಾತ್ರ. ಇನ್ನು ಅನೇಕ ಕಡೆ ನೆಟ್​ವರ್ಕ್ ಸಂಪರ್ಕ ಇಲ್ಲದೆ ಕಂಪ್ಯೂಟರ್/ಮಾನಿಟರ್, ಬ್ಯಾಟರಿಗಳು ಬರ್ಬಾದ್ ಆಗುತ್ತಿವೆ. ಆಸ್ಪತ್ರೆಗಳನ್ನು ಹೈಟೆಕ್ ಮಾಡುವ, ರೋಗಿಗಳ ಸಮಗ್ರ ಮಾಹಿತಿ ಕಂಪ್ಯೂಟರೀಕರಿಸುವ ಯೋಜನೆಗೆ ಶುಶ್ರೂಷೆ ಇಲ್ಲದಾಗಿದೆ.
2016-17ನೇ ಸಾಲಿನಲ್ಲಿ 47 ಆಸ್ಪತ್ರೆಗಳಲ್ಲಿ ಇ-ಹಾಸ್ಪಿಟಲ್ ಯೋಜನೆ ಜಾರಿಗೊಳಿಸಲು ಸರ್ಕಾರ 34 ಕೋಟಿ ರೂ. ಬಿಡುಗಡೆ ಮಾಡಿತ್ತು. ಆದರೆ, ಈ ಹಣ ಸಂಪೂರ್ಣ ಸದ್ಬಳಕೆಯಾಗಿಲ್ಲ. ಇ-ಹಾಸ್ಪಿಟಲ್ ಯೋಜನೆ ಜಾರಿಗೊಳಿಸಿರುವ ಪೈಕಿ ಬಹುತೇಕ ಆಸ್ಪತ್ರೆಗಳು ಹೊರ-ಒಳ ರೋಗಿಗಳ ಡೇಟಾ ಎಂಟ್ರಿಗಷ್ಟೇ ಸೀಮಿತ ಆಗಿವೆ. ಡೇಟಾ ಎಂಟ್ರಿಗೆ ಬಳಸಿ ಉಳಿದ ಕಂಪ್ಯೂಟರ್, ಬ್ಯಾಟರಿಗಳು ನಿರುಪಯುಕ್ತವಾಗುತ್ತಿವೆ. ಟ್ಯಾಬ್​ಗಳನ್ನು ಬಳಸುತ್ತಿಲ್ಲ. ಕೆಲವಕ್ಕೆ ಕೇಬಲ್-ನೆಟ್ ಸಂಪರ್ಕ ಪರಿಪೂರ್ಣಗೊಂಡಿಲ್ಲ, ಎಲೆಕ್ಟ್ರಿಕ್ ಕೆಲಸವೂ ಆಗಿಲ್ಲ. ಕಂಪ್ಯೂಟರ್ ಟೇಬಲ್-ಚೇರ್​ಗಳನ್ನು ಒದಗಿಸಿಲ್ಲ.
2016ರಲ್ಲೇ ಮೊದಲ ಹಂತ ಮುಗಿದು ಈ ವೇಳೆಗಾಗಲೇ ರಾಜ್ಯದ ಎಲ್ಲ ಸರ್ಕಾರಿ ಆಸ್ಪತ್ರೆಗಳೂ ಇ-ಹಾಸ್ಪಿಟಲ್ ಸಂಪರ್ಕ ಪಡೆಯಬೇಕಿತ್ತು. ಆದರೆ, ಇನ್ನೂ 47 ಆಸ್ಪತ್ರೆಗಳಲ್ಲೇ ಯೋಜನೆ ಕುಂಟುತ್ತ ಸಾಗಿದೆೆ.
ಮೊದಲ ಹಂತದಲ್ಲೇ ವೈಫಲ್ಯ: ಇ-ಹಾಸ್ಪಿಟಲ್ ಬಗ್ಗೆ ಅಧಿಕಾರಿಗಳಲ್ಲಿ ಮೊದಲಿದ್ದ ಉತ್ಸುಕತೆ ಈಗಿಲ್ಲ. ನಿರ್ವಹಣೆ ಹೊಣೆ ಹೊತ್ತಿರುವ ಖಾಸಗಿ ಏಜೆನ್ಸಿಯೂ ಸಮರ್ಪಕವಾಗಿ ಕೆಲಸ ಮಾಡುತ್ತಿಲ್ಲ. ಕನಿಷ್ಠ ಪಕ್ಷ ವೈದ್ಯಕೀಯ ಕಾಲೇಜು ಆಸ್ಪತ್ರೆಗಳಿಗೆ ಶಿಫಾರಸು ಮಾಡಿದಾಗ ಅದರ ಮಾಹಿತಿ ಇ-ಹಾಸ್ಪಿಟಲ್ ಯೋಜನೆ ಮೂಲಕ ಆಗಬೇಕು. ಅದೂ ಸರಿಯಾಗಿ ಆಗುತ್ತಿಲ್ಲ. ಮೊದಲ ಹಂತದಲ್ಲೇ ಯೋಜನೆ ಮುಗ್ಗರಿಸಿದ್ದರೂ ಎರಡನೇ ಹಂತದ ಇ-ಹಾಸ್ಪಿಟಲ್ ಯೋಜನೆಗೆ ಸರ್ಕಾರ 66.88 ಕೋಟಿ ರೂ. ಬಿಡುಗಡೆ ಮಾಡಿದೆ. ಮತ್ತೊಂದೆಡೆ ಇ-ಹಾಸ್ಪಿಟಲ್ ಕಂಪ್ಯೂಟರ್ ಜಾಲಕ್ಕೆ ಆಸ್ಪತ್ರೆಯ ಬಳಕೆದಾರರ ನಿಧಿಯಿಂದಲೇ ನೆಟ್ ಸಂಪರ್ಕ ಬಳಸುವಂತೆ ಸರ್ಕಾರ ಸೂಚಿಸಿದೆ. ಆದರೆ, ಅನೇಕ ಕಡೆ ಈ ನಿಧಿಯಲ್ಲಿ ಹಣವೇ ಇಲ್ಲದ್ದರಿಂದ ಆಸ್ಪತ್ರೆಯ ಅಧಿಕಾರಿ ವರ್ಗಕ್ಕೂ ಇದರ ಉಸಾಬರಿ ಬೇಡ ಎಂಬಂತಾಗಿದೆ. 5 ವರ್ಷದ ನಿರ್ವಹಣೆ ಹೊಣೆ ಹೊತ್ತಿರುವ ಏಜೆನ್ಸಿಗೂ ಸರ್ಕಾರ ಹಣ ಬಿಡುಗಡೆ ಮಾಡದ್ದರಿಂದ ಕಂಪ್ಯೂಟರ್​ಗಳು ಕೊಳೆಯುತ್ತಿವೆ. ಇ-ಹಾಸ್ಪಿಟಲ್​ನಲ್ಲಿ 15 ಮಾಡ್ಯೂಲ್​ಗಳಿದ್ದು, ಸದ್ಯ ಒಪಿಡಿ, ಐಪಿಡಿ, ಬಿಲ್ಲಿಂಗ್, ಅಪಘಾತ, ಕೆಲವೆಡೆ ಫಾರ್ಮಸಿ, ಲ್ಯಾಬೋರೇಟರಿ ಸೇರಿ ಐದಾರು ಮಾಡ್ಯೂಲ್​ಗಳಷ್ಟೇ ಜಾರಿಯಲ್ಲಿವೆ. ಕೇಂದ್ರ ಸರ್ಕಾರ ಸಾಫ್ಟ್​ವೇರ್ ಅಭಿವೃದ್ಧಿಪಡಿಸದಿರುವುದೂ ಪೂರ್ಣ ಪ್ರಮಾಣದ ಅನುಷ್ಠಾನಕ್ಕೆ ಅಡ್ಡಿಯಾಗಿದೆ.
ಇ-ಹಾಸ್ಪಿಟಲ್ ಪ್ರಯೋಜನ
ಆಸ್ಪತ್ರೆಗಳ ಹೊರ ರೋಗಿ ವಿಭಾಗ, ವಾರ್ಡ್ ದಾಖಲೆ, ಹೊರ ರೋಗಿಗಳ ಪುನರ್ ಭೇಟಿ, ಅಪಘಾತ, ತುರ್ತು ನೋಂದಣಿ, ಬಿಲ್ ಪಾವತಿ, ಔಷಧ ದಾಸ್ತಾನು, ಪ್ರಯೋಗಾಲಯ ಮಾಹಿತಿ, ರೇಡಿಯಾಲಜಿ ಇನ್ಪಮೇಷನ್ ಸಿಸ್ಟಮ್ ಡಿಸ್​ಚಾರ್ಜ್ ಸಮ್ಮರಿ, ರಕ್ತ ನಿಧಿ ಕೇಂದ್ರ, ರಕ್ತ ದಾಸ್ತಾನು ವಿವರ, ಶಸ್ತ್ರ ಚಿಕಿತ್ಸೆ, ವಾರ್ಡ್ ಗಳ ನಿರ್ವಹಣೆ, ಎಲೆಕ್ಟ್ರಾನಿಕ್ ಹೆಲ್ತ್ ರೆಕಾರ್ಡ್ಸ್, ರೇಡಿಯಾಲಜಿ, ಇಮೇಜಿಂಗ್, ಶಸ್ತ್ರ ಚಿಕಿತ್ಸೆ ನಿರ್ವಹಣೆ, ಎಲೆಕ್ಟ್ರಾನಿಕ್ ಮೆಡಿಕಲ್ ರೆಕಾರ್ಡ್ ಇ-ಹಾಸ್ಪಿಟಲ್​ನಲ್ಲಿ ಸಿಗಲಿವೆ.
ಹಲವು ಸಂಶಯ
ರಾಷ್ಟ್ರೀಯ ಆರೋಗ್ಯ ಅಭಿಯಾನ ಈ ಯೋಜನೆ ಜಾರಿಗೊಳಿಸಿದ್ದು, ಕಾಟಾಚಾರಕ್ಕೆ ಹಣ ಬಿಡುಗಡೆ ಮಾಡಿ ಕೈ ತೊಳೆದುಕೊಂಡಿದೆ. 1ನೇ ಹಂತದ ಯೋಜನೆ ಫಲಿತಾಂಶವೇ ಫಲಕಾರಿ ಆಗದಿರುವಾಗ 2ನೇ ಹಂತದ ಯೋಜನೆಯಡಿ ತಾಲೂಕು ಆಸ್ಪತ್ರೆ ಒಳಗೊಂಡಂತೆ 122 ಆಸ್ಪತ್ರೆಗಳಿಗೆ ಇ-ಹಾಸ್ಪಿಟಲ್ ಯೋಜನೆ ಜಾರಿಗೊಳಿಸಲು ಮುಂದಾಗಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ.
ರೋಗಿ-ವೈದ್ಯ ಇಬ್ಬರಿಗೂ ಉಪಯೋಗ
ರೋಗಿ ಕಾಯುವ ಅವಧಿ ಕಡಿಮೆ, ಪ್ರತಿ ರೋಗಿಗೆ ಆಧಾರ್ ಆಧಾರಿತ ಪ್ರತ್ಯೇಕ ನೋಂದಣಿ ಸಂಖ್ಯೆ, ಕ್ಷಣ ಮಾತ್ರದಲ್ಲಿ ರೋಗಿಯ ಸಮಗ್ರ ಮಾಹಿತಿ ಲಭಿಸುತ್ತದೆ. ಟೋಕನ್ ನಂಬರ್, ಮುದ್ರಿತ ಹೊರ ರೋಗಿ ಚೀಟಿ, ಸಂರ್ಪಸಬೇಕಾದ ವೈದ್ಯರ ವಿವರ ರೋಗಿಗೆ ಸರಾಗವಾಗಿ ಸಿಗುತ್ತದೆ. ಎಲ್ಲ ಹಣಕಾಸು ವ್ಯವಹಾರ ಗಣಕೀಕೃತ ಆಗಿರುತ್ತದೆ. ರೋಗಿಯ ಸ್ಥಳ, ಮೊಬೈಲ್ ಸಂಖ್ಯೆ ಮತ್ತಿತರ ವಿವರಗಳು ಇರುತ್ತವೆ. ರೋಗಿ ಪುನಃ ಆಸ್ಪತ್ರೆಗೆ ಬಂದಾಗ ಚಿಕಿತ್ಸೆ ನೀಡಲು ವೈದ್ಯರಿಗೆ ಇ-ಹಾಸ್ಪಿಟಲ್​ನಿಂದ ಹೆಚ್ಚು ಅನುಕೂಲ. ರೋಗಿಯ ಎಲ್ಲ ಮಾಹಿತಿ ಆನ್​ಲೈನ್​ನಲ್ಲೇ ಲಭಿಸುತ್ತದೆ. ಚೀಟಿ ಬರೆಯುವ ಮುನ್ನ ಆಸ್ಪತ್ರೆಯ ಔಷಧ ದಾಸ್ತಾನಿನ ಮಾಹಿತಿಯೂ ವೈದ್ಯರಿಗೆ ಸಿಗುತ್ತದೆ.
ಸಮನ್ವಯ ಸಮಸ್ಯೆ
ಆರೋಗ್ಯ ಕರ್ನಾಟಕದನ್ವಯ ಪ್ರಾಥಮಿಕ ಹಂತದಿಂದ ತೃತೀಯ ಹಂತದ ಚಿಕಿತ್ಸೆಯವರೆಗೆ ರೋಗಿಯ ಅನುಸರಣೆ (ಟ್ರಾ್ಯಕಿಂಗ್), ಸರ್ಕಾರಿ ಆಸ್ಪತ್ರೆಯಿಂದ ಖಾಸಗಿ ಆಸ್ಪತ್ರೆಗೆ ರೋಗಿಯ ಶಿಫಾರಸಿಗೆ ಇ-ಹಾಸ್ಪಿಟಲ್ ವ್ಯವಸ್ಥೆ ಅಗತ್ಯ. ಆದರೆ, ಇನ್ನೂ ಸರ್ಕಾರಿ ಆಸ್ಪತ್ರೆಗಳಲ್ಲೇ ಪೂರ್ಣ ಪ್ರಮಾಣದಲ್ಲಿ ಸಂಪರ್ಕ ಸಾಧ್ಯವಿಲ್ಲದಿರುವಾಗ ಖಾಸಗಿ ಆಸ್ಪತ್ರೆಯ ಜತೆ ಸಮನ್ವಯ ಸದ್ಯಕ್ಕಂತೂ ಕಷ್ಟ.