**ಜ್ಞಾನ ಕಾರಂಜಿ**::: ಭಾರತ ಉಗ್ರಪೀಡಿತ!,

ಉಗ್ರರ ದಾಳಿಗೆ ಅತಿ ಹೆಚ್ಚು ನಲುಗಿದ ರಾಷ್ಟ್ರಗಳ ಪಟ್ಟಿಯಲ್ಲಿ ಭಾರತ ಮೂರನೇ ಸ್ಥಾನದಲ್ಲಿದೆ! ಮೊದಲೆರಡು ಸ್ಥಾನಗಳಲ್ಲಿ ಇರಾಕ್ ಮತ್ತು ಅಫ್ಘಾನಿಸ್ತಾನ ಇವೆ. ಭಾರತದಲ್ಲಿ 43 ಉಗ್ರರ ಗುಂಪುಗಳು ಸಕ್ರಿಯವಾಗಿದ್ದು, 2017ರಲ್ಲಿ ಒಟ್ಟಾರೆ 860 ದಾಳಿಗಳು ನಡೆದಿವೆ. ಇದರಿಂದ 344 ಮಂದಿ ಮೃತಪಟ್ಟಿದ್ದಾರೆ. ಈ ಪೈಕಿಯಲ್ಲಿ ಶೇ. 89 ಮಂದಿ ಜಮ್ಮು-ಕಾಶ್ಮೀರದಲ್ಲಿ ಅಸುನೀಗಿದ್ದಾರೆ ಎಂದು ಅಮೆರಿಕದ ವಿದೇಶಾಂಗ ಇಲಾಖೆ ತಿಳಿಸಿದೆ.
 ಅಮೆರಿಕದ ಭಯೋತ್ಪಾದನೆ ಮತ್ತು ಭಯೋತ್ಪಾದನೆಗೆ ಪ್ರತಿಕ್ರಿಯೆ ಅಧ್ಯಯನದ ರಾಷ್ಟ್ರೀಯ ಒಕ್ಕೂಟ, ವಿದೇಶಾಂಗ ಇಲಾಖೆಯ ಕೋರಿಕೆ ಮೇರೆಗೆ ಈ ವಿಶ್ಲೇಷಣಾ ವರದಿ ಸಲ್ಲಿಸಿದೆ. 2016ಕ್ಕೆ ಹೋಲಿಸಿದರೆ ಭಾರತದಲ್ಲಿ ಶೇ. 8 ವಿಧ್ವಂಸಕ ಕೃತ್ಯ ತಗ್ಗಿದೆ. ಆದರೂ ಭಾರತ ಮೂರನೇ ಸ್ಥಾನದಲ್ಲಿದೆ. 2016ರಲ್ಲೂ ಭಾರತ ಮೂರನೇ ಸ್ಥಾನದಲ್ಲಿತ್ತು ಮತ್ತು ಭಯೋತ್ಪಾದನಾ ದಾಳಿಗೆ ಸತ್ತವರ ಸಂಖ್ಯೆ 380 ಆಗಿತ್ತು. 2015ರಲ್ಲಿ ಪಾಕಿಸ್ತಾನ ತೃತೀಯ ಸ್ಥಾನದಲ್ಲಿತ್ತು ವರದಿ ತಿಳಿಸಿದೆ.
ಭಾರತದಲ್ಲಿ ನಡೆಯುವ ಬಹುತೇಕ ಉಗ್ರ ದಾಳಿಗಳು ಪಾಕಿಸ್ತಾನದಿಂದ ಪ್ರಚೋದಿತವಾಗಿರುತ್ತವೆ. ಉಗ್ರರ ಇಂಥ ಸಂಚಿಗೆ ಪಾಕ್ ಸೇನೆ ಮತ್ತು ಬೇಹುಗಾರಿಕಾ ಸಂಸ್ಥೆಗಳ ಕುಮ್ಮಕ್ಕು ಇರುತ್ತದೆ. ದಶಕಗಳಿಂದ ಉಗ್ರರನ್ನು ರಫ್ತು ಮಾಡುತ್ತಿರುವ ಪಾಕಿಸ್ತಾನದಲ್ಲೂ ಭಯೋತ್ಪಾದನಾ ಗುಂಪುಗಳು ದಾಳಿ ನಡೆಸುತ್ತಿವೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಕಾಶ್ಮೀರದಲ್ಲಿ ಹೆಚ್ಚು ದಾಳಿ: 2017ರಲ್ಲಿ ಭಾರತದ ಮೂರು ರಾಜ್ಯಗಳಲ್ಲಿ ಹೆಚ್ಚಿನ ವಿಧ್ವಂಸಕ ಕೃತ್ಯಗಳು ನಡೆದಿವೆ. ಜಮ್ಮು- ಕಾಶ್ಮೀರದಲ್ಲೆ ಅತಿ ಹೆಚ್ಚು (ಶೇ. 25) ದಾಳಿಗಳು ನಡೆದಿದ್ದು, ಛತ್ತೀಸ್​ಗಢ (ಶೇ. 15) ಮತ್ತು ಪಶ್ಚಿಮ ಬಂಗಾಳ (ಶೇ. 10) ನಂತರ ಸ್ಥಾನದಲ್ಲಿವೆ.
ವಿಶ್ವದಲ್ಲಿ 18,753 ಮಂದಿ ಸಾವು: 2017ರಲ್ಲಿ ವಿಶ್ವದಾದ್ಯಂತ 8,584 ಭಯೋತ್ಪಾದನಾ ದಾಳಿಗಳು ನಡೆದಿದ್ದು, ಒಟ್ಟಾರೆ 18,753 ಜನರು ಬಲಿಯಾಗಿದ್ದಾರೆ. 19, 461 ಮಂದಿ ಗಾಯಗೊಂಡಿದ್ದಾರೆ.
ಅಪಾಯಕಾರಿ ನಕ್ಸಲ್
ಭಾರತದಲ್ಲಿ ಒಂದೆಡೆ ಉಗ್ರವಾದಿಗಳ ಉಪಟಳ ಹೆಚ್ಚುತ್ತಿದ್ದರೆ, ಇನ್ನೊಂದೆಡೆ ನಕ್ಸಲರ ದಾಳಿಯಿಂದ ದೇಶ ನಲುಗುತ್ತಿದೆ. ಕಳೆದ ವರ್ಷ ನಡೆದ ವಿಧ್ವಂಸಕ ಕೃತ್ಯಗಳ ಪೈಕಿ ಸಿಪಿಐ (ಮಾವೋವಾದಿ) ನಕ್ಸಲರು ನಡೆಸಿದ ದಾಳಿ ಪ್ರಮಾಣ ಶೇ. 53. 2016ಕ್ಕೆ (338 ದಾಳಿ) ಹೋಲಿಸಿದರೆ 2017ರಲ್ಲಿ (295 ದಾಳಿ) ನಕ್ಸಲರ ವಿಧ್ವಂಸಕ ಕೃತ್ಯ ತಗ್ಗಿದೆ. ಆದರೆ, ಮೃತರ ಸಂಖ್ಯೆಯಲ್ಲಿ ಶೇ. 16 ಮತ್ತು ಗಾಯಗೊಂಡವರ ಸಂಖ್ಯೆಯಲ್ಲಿ ಶೇ. 50 ಹೆಚ್ಚಳವಾಗಿದೆ. ವಿಶ್ವದಲ್ಲಿ ಅತಿ ಅಪಾಯಕಾರಿ ಸಂಘಟನೆಗಳ ಪಟ್ಟಿಯಲ್ಲಿ ಸಿಪಿಐ (ಮಾವೋವಾದಿ) ನಾಲ್ಕನೇ ಸ್ಥಾನದಲ್ಲಿದೆ. ಐಸಿಸ್ (857 ದಾಳಿ) ತಾಲಿಬಾನ್ (703 ದಾಳಿ) ಅಲ್-ಶಬಾಬ್ (353 ದಾಳಿ) ಕ್ರಮವಾಗಿ ಮೊದಲ ಮೂರು ಸ್ಥಾನಗಳಲ್ಲಿವೆ.