**ಜ್ಞಾನ ಕಾರಂಜಿ**::: ಭಾರತಪರ ಸೊಲಿಹ್​ಗೆ ಜಯ,

ಕೊಲೊಂಬೊ: ಮಾಲ್ಡೀವ್ಸ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಚೀನಾ ಬೆಂಬಲಿತ ಅಬ್ದುಲ್ಲಾ ಯಮೀನ್ ಸೋಲು ಅನುಭವಿಸಿದ್ದು, ಭಾರತದ ಪರ ಒಲವು ಹೊಂದಿರುವ ಮೊಹಮದ್ ಸೊಲಿಹ್ ಭರ್ಜರಿ ಗೆಲುವು ಸಾಧಿಸಿದ್ದಾರೆ.
ಕಳೆದೊಂದು ವರ್ಷದಿಂದ ಈ ದ್ವೀಪ ರಾಷ್ಟ್ರದಲ್ಲಿ ಭಾರತ ಹಾಗೂ ಚೀನಾ ಮೇಲುಗೈ ಕುರಿತು ಆಂತರಿಕ ಕಲಹ ನಡೆಯುತ್ತಿತ್ತು. ನಿರ್ಗಮಿತ ಅಧ್ಯಕ್ಷ ಅಬ್ದುಲ್ಲಾ ಯಮೀನ್​ರ ಭಾರತ ವಿರೋಧಿ ನೀತಿಗಳ ಮಧ್ಯೆ ಅಧ್ಯಕ್ಷೀಯ ಚುನಾವಣೆ ನಡೆದಿತ್ತು. ಯಮೀನ್ ಆಡಳಿತಾವಧಿ ನ.17ಕ್ಕೆ ಮುಗಿಯಲಿದೆ.
ಸೋಮವಾರ ಅಧಿಕೃತ ಫಲಿತಾಂಶ ಪ್ರಕಟವಾಗಿದ್ದು, ಮೊಹಮದ್​ಗೆ 1,34,616 ಮತ ಬಂದರೆ, ಅಬ್ದುಲ್ಲಾ 96,132 ಮತಗಳಿಸಿದ್ದಾರೆ. ಮತಗಳಿಕೆಯಲ್ಲಿ ಶೇ.58.33 ಮತಗಳನ್ನು ನೂತನ ಅಧ್ಯಕ್ಷ ಮೊಹಮದ್ ಪಡೆದಿದ್ದಾರೆ ಎಂದು ಅಧಿಕೃತವಾಗಿ ಚುನಾವಣೆ ಆಯೋಗ ಘೋಷಿಸಿದೆ. ಶೇ.89 ಮತದಾನವಾಗಿದ್ದ ಮಾಲ್ಡೀವ್ಸ್ ಚುನಾವಣೆಯಲ್ಲಿ ಅಬ್ದುಲ್ಲಾ ಸರ್ಕಾರವು ತೀವ್ರ ಚುನಾವಣೆ ಅಕ್ರಮ ನಡೆಸಿತ್ತು ಎಂದು ಅಂತಾರಾಷ್ಟ್ರೀಯ ತಜ್ಞರು ವರದಿ ಮಾಡಿದ್ದರು. ಅಂತಾರಾಷ್ಟ್ರೀಯ ವೀಕ್ಷಕರಿಗೂ ವೀಸಾ ನೀಡಿರಲಿಲ್ಲ.
ಮೂರು ದಶಕಗಳ ಕಾಲ ಮಾಲ್ಡೀವ್ಸ್​ನಲ್ಲಿ ಸರ್ವಾಧಿಕಾರ ನಡೆಸಿದ್ದ ಕುಟುಂಬದ ಸದಸ್ಯ ಅಬ್ದುಲ್ಲಾ ಯಮೀನ್, ಚುನಾವಣೆ ಸಂದರ್ಭದಲ್ಲಿ ಮಾಧ್ಯಮ ಹಾಗೂ ಪ್ರತಿಪಕ್ಷಗಳ ಮೇಲೆ ನಿರ್ಬಂಧ ಹೇರಿದ್ದರು. ಪ್ರತಿಪಕ್ಷಗಳ ಚುನಾವಣೆ ಪ್ರಚಾರದ ಸುದ್ದಿಗಳನ್ನು ಪ್ರಕಟಿಸಲು ಕೂಡ ಅವಕಾಶ ನೀಡಿರಲಿಲ್ಲ. ಆದರೆ ಮಾಲ್ಡೀವ್ಸ್ ಡೆಮಾಕ್ರಟಿಕ್ ಪಾರ್ಟಿ ಪರ ಒಲವು ತೋರಿ, ಚೀನಾ ಬೆಂಬಲಿತ ಪಕ್ಷಕ್ಕೆ ಬುದ್ಧಿ ಕಲಿಸಿದ್ದಾರೆ.
ಭಾರತ, ಅಮೆರಿಕ ಸ್ವಾಗತ: ಮಾಲ್ಡೀವ್ಸ್ ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿ ಗೆಲುವನ್ನು ಭಾರತ ಹಾಗೂ ಅಮೆರಿಕ ಸರ್ಕಾರಗಳು ಸ್ವಾಗತಿಸಿವೆ.
ಭಾರತ, ಚೀನಾದ ಮೇಲೆ ಪರಿಣಾಮ?
ಮಾಲ್ಡೀವ್ಸ್​ನಲ್ಲಿ ಪಾರಂಪರಿಕವಾಗಿ ಭಾರತವು ಪ್ರಭಾವ ಹೊಂದಿತ್ತು. ಪ್ರಜಾತಂತ್ರ ಸರ್ಕಾರ ರಚನೆಗೆ ಭಾರತದ ಪಾತ್ರ ದೊಡ್ದದಿತ್ತು.
ಅಬ್ದುಲ್ಲಾ ಯಮೀನ್ ಅಧ್ಯಕ್ಷರಾದ ಬಳಿಕ ಚೀನಾ ಆಡಳಿತವು ಜಲ ವಾಣಿಜ್ಯ ಮಾರ್ಗಕ್ಕಾಗಿ ಸಾವಿರಾರು ಕೋಟಿ ರೂಪಾಯಿ ಹೂಡಿಕೆಗೆ ನಿರ್ಧರಿಸಿತ್ತು.
ಈ ಬೆಳವಣಿಗೆ ನಂತರ ಭಾರತೀಯ ಸೇನೆಯನ್ನು ಹಿಂಪಡೆಯಲು ಸೂಚಿಸಿದ್ದ ಮಾಲ್ಡೀವ್ಸ್, ಭಾರತದ ತೆಕ್ಕೆಯಿಂದ ದೂರ ಸರಿಯುತ್ತಿತ್ತು.
ಈ ಫಲಿತಾಂಶದಿಂದ ಚೀನಾದ ಹೂಡಿಕೆ ಹಾಗೂ ಹಿಂದು ಮಹಾಸಾಗರದ ಮೇಲೆ ಪ್ರಭಾವ ಹೆಚ್ಚಿಸಿಕೊಳ್ಳುವ ಪ್ರಯತ್ನಕ್ಕೆ ಹಿನ್ನಡೆಯಾಗಲಿದೆ.