**ಜ್ಞಾನ ಕಾರಂಜಿ**::: ಆರ್ಚರ್ ಹರ್ವಿಂದರ್ ಸಿಂಗ್​ಗೆ ಸ್ವರ್ಣ ಪದಕ,

ಭಾರತೀಯ ಪ್ಯಾರಾ ಕ್ರೀಡಾಪಟುಗಳ ಶ್ರೇಷ್ಠ ನಿರ್ವಹಣೆ ಸತತ 5ನೇ ದಿನವೂ ಮುಂದುವರಿದಿದೆ. ಒಂದು ಸ್ವರ್ಣ, 3 ಬೆಳ್ಳಿ ಹಾಗೂ4 ಕಂಚು ಸೇರಿದಂತೆ ಗುರುವಾರ 8 ಪದಕ ಜಯಿಸಿದ ಭಾರತ ಒಟ್ಟಾರೆ 37 ಪದಕಗಳೊಂದಿಗೆ ಪದಕಪಟ್ಟಿಯಲ್ಲಿ 9ನೇ ಸ್ಥಾನ ಪಡೆದಿದೆ. ಇದು ಪ್ಯಾರಾ ಏಷ್ಯಾಡ್ ಇತಿಹಾಸದಲ್ಲಿ ಭಾರತದ ಸರ್ವಶ್ರೇಷ್ಠ ನಿರ್ವಹಣೆಯಾಗಿದೆ. ಆರ್ಚರಿ ಪಟು ಹರ್ವಿಂದರ್ ಸಿಂಗ್ ವೈಯಕ್ತಿಕ ರಿಕರ್ವ್ ವಿಭಾಗದಲ್ಲಿ ಸ್ವರ್ಣ ಸಾಧನೆ ಮಾಡಿ ದಿನದ ಗೌರವ ದಕ್ಕಿಸಿಕೊಂಡರು. ಇದರಿಂದ ಕೂಟದಲ್ಲಿ ಭಾರತ ಗೆದ್ದಿರುವ ಸ್ವರ್ಣಗಳ ಸಂಖ್ಯೆ 7ಕ್ಕೇರಿದೆ. ಪದಕಪಟ್ಟಿಯಲ್ಲಿ ಪಾರಮ್ಯ ಮುಂದುವರಿಸಿದ ಚೀನಾ ಇದುವರೆಗೂ 100 ಸ್ವರ್ಣ ಸಾಧನೆ ಮಾಡಿದೆ.
ಚಿನ್ನಕ್ಕೆ ಗುರಿಯಿಟ್ಟ ಹರ್ವಿಂದರ್: ಆರ್ಚರಿ ವೈಯಕ್ತಿಕ ರಿಕರ್ವ್ ಡಬ್ಲ್ಯು2/ಎಸ್​ಟಿ ವಿಭಾಗದಲ್ಲಿ ಹರ್ವಿಂದರ್ ಸಿಂಗ್ 6-0ರಿಂದ ಚೀನಾದ ಜಾವೊ ಲಿಕ್ಸೂ ವಿರುದ್ಧ ಜಯ ದಾಖಲಿಸಿ ಸ್ವರ್ಣಕ್ಕೆ ಮುತ್ತಿಕ್ಕಿದರು. ಸೆಮಿಫೈನಲ್​ನಲ್ಲಿ ಕೊರಿಯಾ ಸ್ಪರ್ಧಿಯಿಂದ ಪ್ರಬಲ ಪೈಪೋಟಿ ಎದುರಿಸಿದ್ದ ಹರ್ವಿಂದರ್, ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ನಿರಾಯಾಸವಾಗಿ ಜಯ ದಾಖಲಿಸಿದರು.
ಮೊನು ಗಂಗಾಸ್​ಗೆ ರಜತ ಪದಕ: ಡಿಸ್ಕಸ್ ಥ್ರೋ ಎಫ್-11 ವಿಭಾಗದಲ್ಲಿ ಮೊನು ಗಂಗಾಸ್, 35.89 ಮೀಟರ್ ಎಸೆದು ಬೆಳ್ಳಿ ಸಾಧನೆ ಮಾಡಿದರು. ಇದರೊಂದಿಗೆ ದಿನದ ಆರಂಭದಲ್ಲೇ ಭಾರತಕ್ಕೆ ಮೊದಲ ಪದಕ ಗೆದ್ದುಕೊಟ್ಟರು. ಆರಂಭಿಕ ಎರಡು ಯತ್ನಗಳಲ್ಲಿ ಎಸೆದ ಎಸೆತಗಳು ವಿಫಲಗೊಂಡರೂ 3ನೇ ಯತ್ನದಲ್ಲಿ ರಜತ ಸಾಧನೆ ಮಾಡಿದರು. ಇದೇ ವಿಭಾಗದಲ್ಲಿ ಏಷ್ಯಾಡ್ ದಾಖಲೆ ನಿರ್ವಿುಸಿದ ಇರಾನ್​ನ ಒಲಾದ್ ಮೆಹದಿ (42ಮೀ) ಸ್ವರ್ಣ ಪದಕ ಜಯಿಸಿದರು. ಲಾಂಗ್​ಜಂಪ್ ಟಿ42/ಟಿ61/ಟಿ63 ವಿಭಾಗದಲ್ಲಿ ವಿಜಯ್ ಕುಮಾರ್, 5.05 ಮೀಟರ್ ಹಾರುವ ಮೂಲಕ ಬೆಳ್ಳಿ ಪದಕಕ್ಕೆ ಕೊರಳೊಡ್ಡಿದರು. ಇದೇ ವಿಭಾಗದಲ್ಲಿ ವೈಯಕ್ತಿಕ ಶ್ರೇಷ್ಠ ಸಾಧನೆ ಮಾಡಿದ ಶ್ರೀಲಂಕಾ ಚರಿತಾ ನಿರ್ಮಲಾ ಬುದ್ದಿಕಾ (5.22 ಮೀ) ಸ್ವರ್ಣ ಗೆದ್ದರು.
ಶಾಟ್​ಪುಟ್ ಎಫ್46 ವಿಭಾಗದಲ್ಲಿ ಮೊಹಮದ್ ಯಾಸೀರ್, 14.22 ಮೀಟರ್ ಎಸೆದು ಕಂಚು ಗೆದ್ದುಕೊಂಡರು. ಕಜಕ್​ಸ್ತಾನದ ಮನ್ಸುರ್​ಬಾಯೆವ್ ರಾವಿಲ್ (14.66ಮೀ) ಬೆಳ್ಳಿ ಗೆದ್ದರೆ, ಚೀನಾದ ವೀ ಇನ್​ಲಾಂಗ್ (15.67ಮೀ) ನೂತನ ಕೂಟ ದಾಖಲೆಯೊಂದಿಗೆ ಸ್ವರ್ಣ ಸಂಪಾದಿಸಿದರು. ದೈಹಿಕವಾಗಿ ದುರ್ಬಲಗೊಂಡವರಿಗೆ ಈ ಸ್ಪರ್ಧೆ ಆಯೋಜಿಸಲಾಗಿತ್ತು. -ಏಜೆನ್ಸೀಸ್
ಮಹಿಳಾ ಟೇಬಲ್ ಟೆನಿಸ್ ತಂಡಕ್ಕೆ ರಜತ
ಮಹಿಳೆಯರ ಟೇಬಲ್ ಟೆನಿಸ್​ನ ಟಿಟಿ 3-5 ವಿಭಾಗದಲ್ಲಿ ಭಾರತದ ಭವಿನಾಬೆನ್ ಪಟೇಲ್ ಹಾಗೂ ಸೊನಾಲ್​ಬೆನ್ ಪಟೇಲ್ ಜೋಡಿ ಫೈನಲ್ ಪಂದ್ಯದಲ್ಲಿ ಇಂಡೋನೇಷ್ಯಾದ ಅಸಾಯೂತ್ ದರಾರತ್ ಹಾಗೂ ಪಾಟ್ಟಾವರ್ಧಿ ಜೋಡಿ ಎದುರು 4-11, 12-14ರಿಂದ ಸೋಲನುಭವಿಸಿತು. ಉಳಿದಂತೆ ಚೆಸ್ ವಿಭಾಗದಲ್ಲಿ ಒಂದು ಬೆಳ್ಳಿ ಹಾಗೂ ಎರಡು ಕಂಚು ಗೆದ್ದುಕೊಂಡಿತು. ಜೆನ್ನಿತ್ತಾ ಅಂಟೋ ಮಹಿಳೆಯರ ವೈಯಕ್ತಿಕ ಪಿ1 ವಿಭಾಗದಲ್ಲಿ ಬೆಳ್ಳಿ ಗೆದ್ದರೆ, ತಂಡದ ವಿಭಾಗದಲ್ಲಿ ಜೆನ್ನಿತ್ತಾ ಹಾಗೂ ಪ್ರೇಮಾ ಕನಿಶ್ರೀ ಜತೆಗೂಡಿ ಕಂಚು ಪಡೆದರು. ಮಹಿಳೆಯರ ಸ್ಟಾ್ಯಂಡರ್ಡ್ ವಿಭಾಗದಲ್ಲಿ ಬಿ2/ಬಿ3 ವಿಭಾಗದಲ್ಲಿ ಮೃನಾಲಿ ಪ್ರಕಾಶ್, ಮೇಘಾ ಚಕ್ರಬೊರ್ತಿ ಹಾಗೂ ತಿಜನ್ ಪುನಾರಮ್ ಒಳಗೊಂಡ ಭಾರತ ತಂಡ ಕಂಚಿಗೆ ತೃಪ್ತಿಪಟ್ಟುಕೊಂಡಿತು. ಬಿ2/ಬಿ3 ವಿಭಾಗ ಸಂಪೂರ್ಣ ಅಂಧತ್ವ ಹೊಂದಿದವರ ನಡುವಿನ ಸ್ಪರ್ಧೆಯಾಗಿದೆ. ಪ್ಯಾರಾ ಪವರ್​ಲಿಫ್ಟಿಂಗ್ ವಿಭಾಗದಲ್ಲಿ ಸುಧೀರ್ 80 ಕೆಜಿ ವಿಭಾಗದಲ್ಲಿ 192 ಕೆಜಿ ಭಾರ ಎತ್ತುವ ಮೂಲಕ ಕಂಚು ಜಯಿಸಿದರು.