**ಜ್ಞಾನ ಕಾರಂಜಿ**::: ಇನ್ನು ಡ್ರೋನ್ ಕಲರವ!

*ನವದೆಹಲಿ:* ಭಾರತದಲ್ಲಿ ಶೀಘ್ರವೇ ಡ್ರೋನ್ ಟ್ಯಾಕ್ಸಿ, ಸರಕು
ಸಾಗಣೆ ಹಾಗೂ ಇತರ ವಾಣಿಜ್ಯ ಸೇವೆಗಳಿಗೆ ಚಾಲನೆ ದೊರೆಯಲಿದೆ!

ಅಂತಿಮ ರೂಪ ಪಡೆಯುತ್ತಿರುವ ನೂತನ ಡ್ರೋನ್ ನೀತಿಯಲ್ಲಿ ಈ ಅಂಶಗಳು ಸೇರಿವೆ. ಇನ್ನೊಂದು
ತಿಂಗಳಲ್ಲಿ ಪ್ರಕಟವಾಗುತ್ತಿರುವ ನೀತಿಯಲ್ಲಿ ಡ್ರೋನ್ ವಾಣಿಜ್ಯ ಬಳಕೆ ಕುರಿತು
ಕ್ರಾಂತಿಕಾರಕ ಕ್ರಮಗಳು ಘೋಷಣೆಯಾಗುವ ಸಾಧ್ಯತೆಯಿದೆ. ಇದರಿಂದ ಭಾರತದಲ್ಲಿ ಭಾರಿ ಪ್ರಮಾಣದ
ಹೂಡಿಕೆ ಹಾಗೂ ಉದ್ಯೋಗವಕಾಶ ಆಗಲಿದೆ. ವಿದೇಶಗಳಲ್ಲಿರುವ ಡ್ರೋನ್ ಬಳಕೆ ನೀತಿ ಕುರಿತು
ಅಧ್ಯಯನ ನಡೆಸಿರುವ ಕೇಂದ್ರ ಸರ್ಕಾರದ ಅಧಿಕಾರಿಗಳು, ಭದ್ರತೆಗೆ ಯಾವುದೆ ಸಮಸ್ಯೆಯಾಗದಂತೆ
ನೀತಿ ರೂಪಿಸಲು ನಿರ್ಧರಿಸಿದ್ದಾರೆ. ಕಳೆದ ನವೆಂಬರ್​ನಲ್ಲಿ ಪ್ರಕಟವಾಗಿದ್ದ ಕರಡು
ನೀತಿಯಲ್ಲಿ ವಿಮಾನ ನಿಲ್ದಾಣ ಹಾಗೂ ಸೂಕ್ಷ್ಮ ಭದ್ರತಾ ಪ್ರದೇಶಗಳನ್ನು ಹೊರತುಪಡಿಸಿ ಉಳಿದೆಡೆ
ಡ್ರೋನ್ ವಾಣಿಜ್ಯ ಬಳಕೆಗೆ ಅವಕಾಶ ನೀಡುವ ಪ್ರಸ್ತಾಪ ಇಡಲಾಗಿತ್ತು. ಸಾರ್ವಜನಿಕರ ಅಹವಾಲು
ಹಾಗೂ ತಜ್ಞರ ಸಲಹೆ ಪಡೆದು ಕೇಂದ್ರ ಸರ್ಕಾರವು ಕರಡು ನೀತಿಗೆ ಅಂತಿಮ ರೂಪ ನೀಡುತ್ತಿದೆ. ಆ
ಪ್ರಕಾರ ಡ್ರೋನ್​ಗಳನ್ನು ವಸ್ತುಗಳ ಸಾಗಣೆ, ಟ್ಯಾಕ್ಸಿ ಹಾಗೂ ಇತರ ವಾಣಿಜ್ಯ ಸೇವೆಗಳಿಗೆ
ಅನುವು ಮಾಡಿಕೊಡಲು ನಿರ್ಧರಿಸಲಾಗಿದೆ.

*ಡ್ರೋನ್ ವಾಣಿಜ್ಯ ಬಳಕೆ ಮಾಡುತ್ತಿರುವ ದೇಶಗಳಿಗೆ ಭೇಟಿ ನೀಡಿ ನೀತಿ
ಅಂತಿಮಗೊಳಿಸಲಾಗುತ್ತಿದೆ. ಕರಡು ನೀತಿಯಲ್ಲಿ ಕೆಲ ಬದಲಾವಣೆ ಮಾಡಿ ಡ್ರೋನ್ ನೀತಿಯನ್ನು
ಕೇವಲ ನಿಯಂತ್ರಣಕ್ಕೆ ಸೀಮಿತಗೊಳಿಸದೆ ಸಮಗ್ರ ಮಾರ್ಗಸೂಚಿಯನ್ನಾಗಿ ಮಾಡಲಾಗುತ್ತಿದೆ. ಭದ್ರತಾ
ಅಂಶಗಳ ಬಗ್ಗೆ ಹೆಚ್ಚಿನ ಗಮನ ನೀಡಲಾಗಿದೆ.*

*| ಜಯಂತ್ ಸಿನ್ಹಾ ನಾಗರಿಕ ವಿಮಾನಯಾನ ರಾಜ್ಯ ಸಚಿವ*



*ಪ್ರತ್ಯೇಕ ಡ್ರೋನ್ ಪಥ*

ಭದ್ರತೆ ಹಾಗೂ ವಿಮಾನ ಸುರಕ್ಷತೆಯ ಹಿನ್ನೆಲೆಯಲ್ಲಿ ಡ್ರೋನ್ ಹಾರಾಟಕ್ಕೂ ಪ್ರತ್ಯೇಕ ಪಥ
ಹಾಗೂ ವಾಯು ಸಂಚಾರ ನಿಯಂತ್ರಕಗಳನ್ನು ಸ್ಥಾಪಿಸಲು ಕೇಂದ್ರ ನಿರ್ಧರಿಸಿದೆ. ವಿಮಾನಯಾನಕ್ಕೆ
ಹೇಗೆ ಪರವಾನಗಿ, ನಿರ್ದಿಷ್ಟ ಪಥಗಳ ಅನುಮತಿ ದೊರೆಯುತ್ತದೋ ಅದೇ ರೀತಿ ಡ್ರೋನ್ ಹಾರಾಟಕ್ಕೂ
ಅವಕಾಶ ಮಾಡಿಕೊಡಲಾಗುತ್ತದೆ. ಭದ್ರತೆ ಕುರಿತು ಹೆಚ್ಚಿನ ಕಾಳಜಿ ವಹಿಸಲಾಗಿದ್ದು, ಪಥ ಬದಲಿಸಿ
ಬರುವ ಡ್ರೋನ್​ಗಳನ್ನು ಕೂಡಲೇ ನಾಶಪಡಿಸುವ ತಂತ್ರಜ್ಞಾನ ಅಭಿವೃದ್ಧಿಪಡಿಸಲಾಗುತ್ತಿದೆ.
ನಿಷೇಧಿತ ಪ್ರದೇಶ ಹಾಗೂ ಅನುಮತಿಯಿಲ್ಲದ ಪಥದಲ್ಲಿ ಯಾವುದೆ ಡ್ರೋನ್ ಸಾಗಿದರೆ
ಹೊಡೆದುರುಳಿಸಲಾಗುತ್ತದೆ. ಇದಕ್ಕಾಗಿ ವಿಶ್ವದಾದ್ಯಂತ ಹೇಗೆ ಸುರಕ್ಷಿತವಾಗಿ ಡ್ರೋನ್
ಬಳಸಲಾಗುತ್ತಿದೆ ಎನ್ನುವುದನ್ನು ಪರಿಶೀಲಿಸಲಾಗಿದೆ. ಅಂದಹಾಗೆ ದುಬೈನಲ್ಲಿ ಈಗಾಗಲೇ ಡ್ರೋನ್
ಟ್ಯಾಕ್ಸಿ ಬಳಕೆ ಆರಂಭವಾಗಿದೆ.