ಬರಲಿದೆ ದೇಶದ ಪ್ರಥಮ ಚಿಟ್ಟೆ ಸಾಕ್ಷ್ಯಚಿತ್ರ

*ಅವಿನ್ ಶೆಟ್ಟಿ, ಉಡುಪಿ*

ದೇಶದಲ್ಲೇ ಪ್ರಥಮವಾಗಿ ಚಿಟ್ಟೆಗಳ ಸಮಗ್ರ ಜೀವನ ಚಿತ್ರಣದ ಸಾಕ್ಷ್ಯಚಿತ್ರ (ಡಾಕ್ಯುಮೆಂಟರಿ)
ಸಿದ್ಧವಾಗುತ್ತಿದೆ. ಮೂಡುಬಿದಿರೆ ಬೆಳುವಾಯಿ ಚಿಟ್ಟೆ ಪಾರ್ಕ್‌ನ ಸಮ್ಮಿಲನ್ ಶೆಟ್ಟಿ ಈ ಸಾಹಸ
ಮಾಡಿದ್ದು, ಇನ್ನೊಂದು ತಿಂಗಳಲ್ಲಿ ಚಿಟ್ಟೆಗಳು ಪರಿಸರ ವ್ಯವಸ್ಥೆಯಲ್ಲಿ ಅತ್ಯಂತ ಮುಖ್ಯ
ಪಾತ್ರ ವಹಿಸುತ್ತವೆ. ಚಿಟ್ಟೆಗಳು ಮತ್ತು ಸಸ್ಯಗಳ ನಡುವೆ ಮಹತ್ವವಾದ ವಿಕಾಸಾತ್ಮಕ
ಸಂಬಂಧವಿದೆ. ಚಿಟ್ಟೆಯ ಸಮಗ್ರ ಜೀವನ ಶೈಲಿಯ ಬಗ್ಗೆ ಜನಸಾಮಾನ್ಯರಿಗೆ ತಿಳಿಹೇಳುವ
ಉದ್ದೇಶದಿಂದ ಸಾಕ್ಷ್ಯಚಿತ್ರವನ್ನು ಸಿದ್ಧಪಡಿಸಲಾಗಿದೆ.

*ಮೊಟ್ಟೆಯಿಂದ ಚಿಟ್ಟೆವರೆಗೆ: *ಬೆಳುವಾಯಿ ಚಿಟ್ಟೆ ಪಾರ್ಕ್‌ನಲ್ಲಿ ಮೂರು ವರ್ಷದಿಂದ
ಸಿದ್ಧತೆ ಮಾಡಿಕೊಂಡು ಸಾಕ್ಷ್ಯಚಿತ್ರ ಮಾಡಲಾಗಿದೆ. ರಾಜ್ಯ ಚಿಟ್ಟೆ ಬಿರುದು ಪಡೆದ ಸದರ್ನ್
ಬರ್ಡ್ ವಿಂಗ್‌ನ ಸಮಗ್ರ ಚಿತ್ರಣ ಇಲ್ಲಿ ದಾಖಲಿಸಲಾಗಿದೆ. ಮುಖ್ಯವಾಗಿ ಪಶ್ಚಿಮಘಟ್ಟದ
ವೈಶಿಷ್ಟವಾಗಿರುವ ಮಲಬಾರ್ ಬ್ಯಾಂಡೆಡ್ ಪಿಕಾಕ್, ಮಲಬಾರ್ ಬ್ಯಾಂಡೆಡ್ ಸ್ವಾಲೊಟೇಲ್
ಚಿಟ್ಟೆಗಳ ಜೀವನಶೈಲಿ ಇಲ್ಲಿ ಸೆರೆಯಾಗಿದೆ. ಹೆಣ್ಣು-ಗಂಡು ಆಕರ್ಷಣೆ, ಮೊಟ್ಟೆ ಇಡುವುದು,
ಬಳಿಕ ಕ್ಯಾಟರ್‌ಪಿಲ್ಲರ್ ಆಗಿ ರೂಪುಗೊಳ್ಳುವುದು, ಕ್ಯಾಟರ್‌ಪಿಲ್ಲರ್ ಬಳಿಕ ಕೋಶ
ನಿರ್ಮಿಸುವುದು, ಕೋಶದಿಂದ ಚಿಟ್ಟೆ ಹೊರಬರುವುದು ಇದೆಲ್ಲವನ್ನು ಪರಿಣಾಮಕಾರಿಯಾಗಿ
ದಾಖಲಿಸಿಕೊಳ್ಳಲಾಗಿದೆ. 3 ವರ್ಷಗಳಿಂದ ಚಿಟ್ಟೆಗಳ ಪ್ರತಿ ಹಂತವನ್ನು ಹಿಂಬಾಲಿಸಿ
ಕ್ಯಾಮರಾದಲ್ಲಿ ಸೆರೆಹಿಡಿಯಲಾಗಿದೆ. ಎಲ್ಲಾ ದಾಖಲೆಗಳನ್ನು ಇದೇ ಪಾರ್ಕ್‌ನಲ್ಲಿ ಮಾಡಿರುವುದು
ವಿಶೇಷ.

ಡಾಕ್ಯುಮೆಂಟರಿಗೆ ಸಂಬಂಧಿಸಿ ವಿಡಿಯೋಗ್ರಫಿಯನ್ನೂ ಸುಂದರವಾಗಿ ಮಾಡಲಾಗಿದೆ. ಮರ, ಗಿಡ, ಹೂ,
ಮಳೆ, ನೀರು ಸೇರಿದಂತೆ ಮುಖ್ಯವಾಗಿ ಚಿಟ್ಟೆಗಳ ಎಲ್ಲಾ ಹಂತವನ್ನು ವಿವಿಧ ಆಯಾಮಗಳಲ್ಲಿ
ಅತ್ಯಾಧುನಿಕ ಕ್ಯಾಮರಗಳಿಂದ ಸೆರೆ ಹಿಡಿಯಲಾಗಿದೆ. ಸಮ್ಮಿಲನ್ ಶೆಟ್ಟಿ ವಿಡಿಯೋಗ್ರಫಿ
ಮಾಡಿದ್ದಾರೆ. 70ಡಿ, 80 ಡಿ, 100 ಎಂ.ಎಂ ಮ್ಯಾಕ್ರೊ ಲೆನ್ಸ್ ಬಳಸಿ ಶೂಟ್ ಮಾಡಲಾಗಿದೆ.
ಡಾ.ಪೃಥ್ವಿರಾಜ್ ಉಮೇಶ್ ಏರಿಯಲ್ ಶೂಟ್ ಮಾಡಿದ್ದಾರೆ, ಜಾಯ್ ಬಜ್ಪೆ ಅವರ ಸಂಕಲನ , ಮಹೇಶ್
ನಾಯಕ್ ಮಂಗಳೂರು ಅವರ ಕಂಟೆಂಟ್ ಸ್ಕ್ರಿಪ್ಟ್ ಡಾಕ್ಯುಮೆಂಟರಿ ಸೊಬಗನ್ನು ಹೆಚ್ಚಿಸಿದೆ.

*ಶಾಲಾ ವಿದ್ಯಾರ್ಥಿಗಳಿಗೆ ಉಚಿತ ಪ್ರದರ್ಶನ: *45 ನಿಮಿಷ ಇರುವ ಈ ಡಾಕ್ಯುಮೆಂಟರಿ ಶೇ.70
ಕೆಲಸವಾಗಿದ್ದು ಒಂದು ತಿಂಗಳಲ್ಲಿ ಪೂರ್ಣಗೊಳ್ಳಲಿದೆ. ಡಾಕ್ಯುಮಂಟರಿ ಸಿದ್ಧವಾದ ಬಳಿಕ
ಬೆಳುವಾಯಿ ಚಿಟ್ಟೆ ಪಾರ್ಕ್‌ನಲ್ಲಿ ಶಾಲೆ ವಿದ್ಯಾರ್ಥಿಗಳಿಗೆ 10 ದಿನ ಉಚಿತ ಪ್ರದರ್ಶನ
ಆಯೋಜಿಸಲಾಗುವುದು. ಯೂ ಟ್ಯೂಬ್‌ನಲ್ಲಿ ಡಾಕ್ಯುಮೆಂಟರಿ ಟ್ರೇಲರ್ ಬಿಡುಗಡೆಯಾಗಿದ್ದು,
ಸಾಕಷ್ಟು ಮಂದಿ ಮೆಚ್ಚುಗೆ ವ್ಯಕ್ತಪಡಿಸಿರುವುದಾಗಿ ಸಮ್ಮಿಲನ್ ಶೆಟ್ಟಿ ತಿಳಿಸಿದ್ದಾರೆ.

*ಚಿಟ್ಟೆ ಪಾರ್ಕ್‌ಗೆ ಐದು ವರ್ಷ: *2011ರಿಂದ ಆರಂಭವಾಗಿ 2013ರಲ್ಲಿ ಉದ್ಘಾಟನೆಗೊಂಡ 7.35
ಎಕರೆ ಪ್ರದೇಶ ಹೊಂದಿರುವ ಬೆಳುವಾಯಿ ಚಿಟ್ಟೆ ಪಾರ್ಕ್‌ಗೆ ಈಗ 5 ವರ್ಷದ ಸಂಭ್ರಮ.
ವಿದ್ಯಾರ್ಥಿಗಳನ್ನು, ಸಾರ್ವಜನಿಕರನ್ನು ವಿಶೇಷವಾಗಿ ಆಕರ್ಷಿಸುತ್ತಿದೆ. ಪ್ರವಾಸೋದ್ಯಮದಲ್ಲಿ
ಎಂ.ಎ.ಪಡೆದಿರುವ ಸಮ್ಮಿಲನ್ ಶೆಟ್ಟಿ ಉದ್ಯೋಗ ತೊರೆದು, ಪೂರ್ಣಪ್ರಮಾಣದಲ್ಲಿ ಪಾರ್ಕ್‌ನಲ್ಲಿ
ತೊಡಗಿಸಿಕೊಂಡವರು. ಚಿಟ್ಟೆ ಸಂರಕ್ಷಣೆ ಜಾಗೃತಿ ಮೂಡಿಸುತ್ತಿದ್ದಾರೆ. ಸರ್ಕಾರಿ ಶಾಲೆ
ವಿದ್ಯಾರ್ಥಿಗಳಿಗೆ ಪಾರ್ಕ್‌ಗೆ ಉಚಿತ ಪ್ರವೇಶ. ಚಿಟ್ಟೆ ಪಾರ್ಕ್ ವರ್ಲ್ಡ್ ಬುಕ್ ಆಫ್
ರೆಕಾರ್ಡ್ ಲಂಡನ್ ಗೌರವಕ್ಕೂ ಪಾತ್ರವಾಗಿದೆ.

ಪರಿಸರ ವ್ಯವಸ್ಥೆ ವಿಸ್ತೃತ ಸೂಚಕವಾಗಿರುವ ಚಿಟ್ಟೆಗಳ ಬಗ್ಗೆ ಜನಸಮಾನ್ಯರಿಗೆ ತೋರಿಸುವ
ಉದ್ದೇಶ, ಚಿಟ್ಟೆಗಳ ಬಗ್ಗೆ ಜಾಗೃತಿ ಮೂಡಿಸುವ ಆಶಯದಿಂದ ಈ ಪ್ರಯತ್ನಕ್ಕೆ ಮನಸ್ಸು
ಮಾಡಿದ್ದೆ. 3 ವರ್ಷಗಳ ಶ್ರಮವಹಿಸಿ, ಸದ್ಯ ಸಾಕ್ಷ್ಯಚಿತ್ರದ ಕೆಲಸ ಬಹುತೇಕ ಪೂರ್ಣಗೊಂಡಿದೆ.
*|ಸಮ್ಮಿಲನ್ ಶೆಟ್ಟಿ, ಚಿಟ್ಟೆ ಸಂರಕ್ಷಕ*