**ಜ್ಞಾನ ಕಾರಂಜಿ**::: ಔಷಧೀಯ ಗುಣ ಹೊಂದಿರುವ ‘ಮುಟ್ಟಿದರೆ ಮುನಿ’ ಗಿಡಮೂಲಿಕೆ,

‘ನಾಚಿಕೆಮುಳ್ಳು’ ಎಂದು ಆಡು ಭಾಷೆಯಲ್ಲಿ ಕರೆಯಲ್ಪಡುವ ಗಿಡಮೂಲಿಕೆ ‘ಮುಟ್ಟಿದರೆ ಮುನಿ’. ಇದರ ಔಷಧೀಯ ಗುಣಗಳು ಅನೇಕ. ಈ ಔಷಧೀಯ ಗುಣಗಳನ್ನು ಹೊಂದಿರುವ ಸಸ್ಯಗಳನ್ನು ನಮ್ಮ ಆಹಾರದಲ್ಲಿ ಬಳಸಿದರೆ ಅದು ಆರೋಗ್ಯವನ್ನು ಕಾಯ್ದುಕೊಳ್ಳಲು ನಮಗೆ ಅನುವು ಮಾಡಿಕೊಡುತ್ತದೆ. ಮದ್ದಾಗಿ ಬಳಸಿದರೆ ರೋಗಗಳನ್ನು ಗುಣಮಾಡಿಕೊಳ್ಳಲು ಅವಕಾಶ ಮಾಡಿಕೊಡುತ್ತದೆ. ಆಹಾರವಾಗಿ ಉಪಯೋಗಿಸಬಹುದಾದ ಬಹಳ ಸುಲಭ ವಿಧಾನ ತಂಬುಳಿ. ತಂಬುಳಿಯನ್ನು ಮಾಡಿ ಅದನ್ನು ಅನ್ನದ ಜೊತೆಯಲ್ಲಿ ಸೇರಿಸಿ ಸೇವಿಸಬಹುದು.
ಮುಟ್ಟಿದರೆ ಮುನಿಯ ಸೊಪ್ಪನ್ನು ಮಾತ್ರ ತೆಗೆದುಕೊಂಡು ಅದನ್ನು ತುಪ್ಪದಲ್ಲಿ ಹುರಿಯಬೇಕು. ಹುರಿದ ಹದಿನೈದು ಇಪ್ಪತ್ತು ಎಲೆಗಳನ್ನು ತೆಂಗಿನ ತುರಿಯೊಂದಿಗೆ ಸೇರಿಸಿ ರುಬ್ಬಿಕೊಳ್ಳಬೇಕು. ಇದಕ್ಕೆ ಸ್ವಲ್ಪ ಜೀರಿಗೆ, ಕಾಳುಮೆಣಸಿನ ಪುಡಿ, ಸಾಸಿವೆಯ ಒಗ್ಗರಣೆ ಹಾಕಿದರೆ ತಂಬುಳಿ ಸಿದ್ಧ. ಬೇಕಾದಲ್ಲಿ ಸ್ವಲ್ಪ ಬೆಲ್ಲ, ಉಪ್ಪು ಸೇರಿಸಿಕೊಳ್ಳಬಹುದು. ಮುಟ್ಟಿದರೆ ಮುನಿಗೆ ಯಾವುದೇ ರೀತಿಯ ಅಡ್ಡ ವಾಸನೆಗಳೂ ಇರುವುದಿಲ್ಲ. ಇದನ್ನು ಆರಾಮವಾಗಿ ಬಳಸಬಹುದು. ಜ್ಯೂಸ್ ಮಾಡಿ ಕುಡಿಯುವುದು ಕೂಡ ಉತ್ತಮ ವಿಧಾನ.
ಮುಟ್ಟಿದರೆ ಮುನಿಯ ವೈಶಿಷ್ಟ್ಯ ಏನೆಂದರೆ ನಾವು ಯಾವಾಗ ಅದನ್ನು ಮುಟ್ಟುತ್ತೇವೆಯೋ ಆಗೆಲ್ಲ ಅದು ಮುದುಡಿಕೊಳ್ಳುತ್ತದೆ. ಇದು ನಮಗೆಲ್ಲ ತಿಳಿದಿರುವಂತಹ ಸಂಗತಿ. ಅಂತೆಯೇ ನಮ್ಮ ದೇಹದಲ್ಲಿ ಯಾವ ಯಾವ ಭಾಗದಲ್ಲಿ, ಯಾವ ಯಾವ ತೊಂದರೆಗಳಲ್ಲಿ ಮುದುಡಿಕೊಳ್ಳಬೇಕಾದಂತಹ ಆವಶ್ಯಕತೆ ಇರುತ್ತದೆಯೋ ಅಲ್ಲೆಲ್ಲ ನಾವು ಮುಟ್ಟಿದರೆ ಮುನಿಯನ್ನು ಔಷಧಿಯಾಗಿ ಬಳಸಬಹುದು. ಹಾಗಾದರೆ ಆ ಎಲ್ಲ ತೊಂದರೆಗಳು ಯಾವುವು, ಅಲ್ಲಿ ಹೇಗೆ ಇದನ್ನು ಬಳಸುವುದು ಎಂಬುದನ್ನು ಮುಂದಿನ ಅಂಕಣದಲ್ಲಿ ತಿಳಿಯೋಣ.