**ಜ್ಞಾನ ಕಾರಂಜಿ**::: ಜೈವಿಕ ಕೀಟ ನಿಯಂತ್ರಣ,

ಹಾರುವ ಜೇಡಗಳ ಮೂಲಕ ಕೃಷಿಗೆ ಬಾಧಿಸುವ ಕೀಟಗಳ ನಿಯಂತ್ರಣಕ್ಕೆ ತಜ್ಞರ ತಂಡ ಮುಂದಾಗಿದೆ.ದಕ್ಷಿಣ ಏಷ್ಯಾಭಾಗದಲ್ಲಿರುವ ಹಾರುವ ಜೇಡ (ಹೈಲಸ್ ಸೆಮಕ್ಯುಪೆರಸ್) ಕೀಟದ ಮೊಟ್ಟೆಗಳನ್ನು ಭಕ್ಷಿಸುತ್ತದೆ ಎಂಬುದನ್ನು ಪತ್ತೆ ಮಾಡಲಾಗಿದ್ದು, ಇದು ಕೀಟ ನಿಯಂತ್ರಣದ ಜೈವಿಕ ವಿಧಾನಗಳನ್ನು ಕಂಡುಕೊಳ್ಳುವಲ್ಲಿ ಸಹಾಯಕವಾಗಲಿದೆ.
ಆಂಧ್ರಪ್ರದೇಶ ಮೂಲದ ವನ್ಯಜೀವಿ ಛಾಯಾಗ್ರಾಹಕ ಎ.ಎನ್.ಸುರೇಶ್ ಕುಮಾರ್ ಮೊದಲ ಬಾರಿಗೆ ಈ ಜೇಡದ ವರ್ತನೆ ಗಮನಿಸಿ ದಾಖಲಿಸಿದ್ದರು. ಬಳಿಕ ತಮ್ಮ ತಂಡಕ್ಕೆ ಮಾಹಿತಿ ರವಾನಿಸಿದ್ದರು. ಜೇಡಗಳ ಕುರಿತ ಹಿರಿಯ ತಜ್ಞ ಡೇವಿಡ್ ಇ.ಹಿಲ್, ಬ್ರಿಟಿಷ್ ಜೇಡ ತಜ್ಞ ರಿಚರ್ಡ್ ಜೆ.ಪೀರ್ಸ್, ಸಂಶೋಧಕ ಜಾವೇದ್ ಅಹಮದ್, ಸಹ ಸಂಶೋಧಕರಾದ ರಾಜಶ್ರೀ ಖಲಪ್ ಮತ್ತು ಮೂಡುಬಿದಿರೆಯ ಡಾ.ಕೃಷ್ಣಮೋಹನ್ ತಂಡದ ಇತರ ಸದಸ್ಯರು.
ಈ ಸಂಶೋಧನೆಯನ್ನು ‘ಪೆಖಾಮಿಯಾ’ ಅಂತಾರಾಷ್ಟ್ರೀಯ ನಿಯತಕಾಲಿಕದಲ್ಲಿ ಪ್ರಕಟಿಸಲಾಗಿದೆ. ಹಾರುವ ಜೇಡ ಸಾಮಾನ್ಯವಾಗಿ ಸಣ್ಣ ಕೀಟಗಳನ್ನು ತಿಂದು ಬದುಕುತ್ತದೆ ಎಂದು ಇದುವರೆಗೆ ಭಾವಿಸಲಾಗಿತ್ತು. ಆದರೆ ಸುರೇಶ್ ಕುಮಾರ್ ಆಂಧ್ರಪ್ರದೇಶದ ತಮ್ಮ ಗದ್ದೆ ಬಳಿ ಸೆರೆಹಿಡಿದ ಚಿತ್ರದಲ್ಲಿ ಕೀಟವೊಂದರ (ಎಲೆ ಪಾದದ ಕೀಟ) ತತ್ತಿಗಳನ್ನು ತಿನ್ನುವುದನ್ನು ಸೆರೆ ಹಿಡಿದರು. ಇದನ್ನು ಫೇಸ್​ಬುಕ್ ಗ್ರೂಪ್​ನಲ್ಲೂ ಷೇರ್ ಮಾಡಿದರು, ಆದರೆ ಅವರಿಗೆ ಇದು ಜೇಡದ ಹೊಸ ವರ್ತನೆಯ ದಾಖಲೆ ಎನ್ನುವ ಅರಿವು ಇರಲಿಲ್ಲ.
ಆದರೆ, ಜಾವೇದ್ ಇದನ್ನು ಗುರುತಿಸಿ ಇನ್ನಷ್ಟು ಮಾಹಿತಿ ನೀಡಲು ಸೂಚಿಸಿದರು. ಇದೊಂದು ಉತ್ತಮ ಗುರುತಿಸುವಿಕೆ, ಯಾಕೆಂದರೆ ಕೃಷಿಗೆ ಬಾಧಿಸುವ ಎಲೆ ಪಾದದ ಕೀಟಗಳ ನಿಯಂತ್ರಣಕ್ಕೆ ಜೈವಿಕ ವಿಧಾನದ ಆವಿಷ್ಕಾರಕ್ಕೆ ಇದು ನೆರವಾಗಲಿದೆ ಎನ್ನುತ್ತಾರೆ ತಜ್ಞರು.