**ಜ್ಞಾನ ಕಾರಂಜಿ**::: ಏಷ್ಯಾಕಪ್​ ಫೈನಲ್​ನಲ್ಲಿ ಮತ್ತೊಂದು ಸಾಧನೆ ಮಾಡಿದ ದಾಖಲೆ ವೀರ ಧೋನಿ:

ದುಬೈ: ಕ್ರಿಕೆಟ್​ ರಂಗದಲ್ಲಿ ಅದ್ಭುತ ಸಾಧನೆ ಮಾಡಿರುವ ಭಾರತೀಯ ಕ್ರಿಕೆಟರ್​, ಟೀಂ ಇಂಡಿಯಾ
ಮಾಜಿ ನಾಯಕ ಮಹೇಂದ್ರ ಸಿಂಗ್​ ಧೋನಿ ಪಂದ್ಯಗಳನ್ನಾಡಿದರೆ ಸಾಕು ಅವರಿಂದ ಒಂದಿಲ್ಲೊಂದು
ದಾಖಲೆ ಸೃಷ್ಟಿಯಾಗುತ್ತದೆ. ಹಾಗೆಯೇ ಫೈನಲ್​ ಪಂದ್ಯದಲ್ಲೂ ಅವರೊಂದು ಸಾಧನೆ ಮಾಡಿ ಮತ್ತಷ್ಟು
ಉತ್ತುಂಗಕ್ಕೇರಿದ್ದಾರೆ.

ಏಷ್ಯಾಕಪ್​ನ ಈ ಟೂರ್ನಿಯಲ್ಲಂತೂ ಧೋನಿ ಅದಾಗಲೇ ಎರಡು ಸಾಧನೆ ಮಾಡಿದ್ದರು. ಒಂದು, ಭಾರತೀಯ
ಕ್ರಿಕೆಟರ್​ಗಳ ಪೈಕಿ ಅತ್ಯಂತ ಹೆಚ್ಚು ಅಂತಾರಾಷ್ಟ್ರೀಯ ಕ್ರಿಕೆಟ್​ ಆಡಿದ ಆಟಗಾರರ
ಪಟ್ಟಿಯಲ್ಲಿ ಧೋನಿ ಎರಡನೇ ಸ್ಥಾನಕ್ಕೇರಿದರು. ಮತ್ತೊಂದು ಏಷ್ಯಾಕಪ್​ನ ಅಫ್ಘಾನಿಸ್ತಾನ
ವಿರುದ್ಧದ ಪಂದ್ಯದಲ್ಲಿ ಕ್ಯಾಪ್ಟನ್​ ಆಗುವ ಮೂಲಕ 200 ಪಂದ್ಯಗಳಲ್ಲಿ ನಾಯಕನಾದ ಕೀರ್ತಿಗೆ
ಪಾತ್ರರಾದರು. ಈಗ ಹೊಸದೊಂದು ದಾಖಲೆ ಸೃಷ್ಟಿಯಾಗಿದೆ.

ಅದೇನೆಂದರೆ, ಬಾಂಗ್ಲಾದೇಶ ಎದುರಿಗಿನ ಫೈನಲ್​ ಪಂದ್ಯದಲ್ಲಿ ಧೋನಿ ಅವರು 800ನೇ ಸ್ಟಂಪ್​
ಔಟ್​ ಮಾಡಿದರು. ಈ ಮೂಲಕ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಅತ್ಯಂತ ಹೆಚ್ಚು ಸ್ಟಂಪ್​ ಔಟ್​
ಮಾಡಿದ ಏಷ್ಯಾದ ಮೊದಲ ಕ್ರಿಕೆಟರ್​ ಎಂಬ ಖ್ಯಾತಿಗೆ ಭಾಜನರಾದರು. ಪಂದ್ಯದ 43ನೇ ಓವರ್​ನಲ್ಲಿ
ಕುಲದೀಪ್​ ಯಾದವ್​ ಅವರ ಬೌಲಿಂಗ್​ನಲ್ಲಿ ಮಶ್ರಫೆ ಮೊರ್ತಜಾ ಅವರ ಸ್ಟಂಪ್​ ಎಗರಿಸುವ ಮೂಲಕ
ಅವರು ಈ ಸಾಧನೆ ಮಾಡಿದರು.

ಕ್ರಿಕೆಟ್​ನ ಮೂರು ಪ್ರಕಾರಗಳಾದ ಟೆಸ್ಟ್​, ಏಕದಿನ, ಟಿ20ಯ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ
ಅತಿ ಹೆಚ್ಚು ಸ್ಟಂಪ್​ ಔಟ್​ ಮಾಡಿದ ವಿಶ್ವದ ವಿಕೆಟ್​ ಕೀಪರ್​ಗಳ ಪಟ್ಟಿಯಲ್ಲಿ ಧೋನಿ ಈಗ
ಮೂರನೇ ಸ್ಥಾನದಲ್ಲಿದ್ದಾರೆ. 998 ಸ್ಟಂಪ್​ ಎಗರಿಸಿ ದಕ್ಷಿಣ ಆಫ್ರಿಕಾದ ಮಾರ್ಕ್​ ಬೌಚರ್​
ಮೊದಲ ಸ್ಥಾನದಲ್ಲಿದ್ದರೆ, 905 ಸ್ಟಂಪ್​ ಔಟ್​ ಮಾಡುವ ಮೂಲಕ ಆಸ್ಟ್ರೇಲಿಯಾದ ವಿಕೆಟ್​
ಕೀಪರ್​ ಆ್ಯಡಮ್​ ಗಿಲ್​ಕ್ರಿಸ್ಟ್​ ಎರಡನೇ ಸ್ಥಾನದಲ್ಲಿದ್ದಾರೆ.

ಸ್ಟಂಪ್ ಔಟ್​ನಲ್ಲಿ ಧೋನಿ ಸಾಧನೆ

ಟೆಸ್ಟ್​ – 294

ಏಕದಿನ – 419

ಟಿ20- 87