**ಜ್ಞಾನ ಕಾರಂಜಿ**::: ಕ್ಯಾನ್ಸರ್ ಚಿಕಿತ್ಸೆಗೆ ವೈದ್ಯಕೀಯ ನೊಬೆಲ್,

ಸ್ಟಾಕ್​ಹೋಮ್:  ಮಾರಣಾಂತಿಕ ಕ್ಯಾನ್ಸರ್ ರೋಗಕ್ಕೆ ಚೆಕ್​ಪಾಯಿಂಟ್ ಥೆರಪಿ ಸಂಶೋಧಿಸಿದ ಜೇಮ್್ಸ ಅಲಿಸನ್ ಹಾಗೂ ತಸುಕು ಹೊಂಜೋ ಅವರಿಗೆ 2018ನೇ ಸಾಲಿನ ವೈದ್ಯಕೀಯ ನೊಬೆಲ್ ಘೋಷಿಸಲಾಗಿದೆ.
ಅಮೆರಿಕದ ಅಲಿಸನ್ ಹಾಗೂ ಜಪಾನ್​ನ ಹೊಂಜೋ ಅವರು ಕ್ಯಾನ್ಸರ್ ವಿರುದ್ಧ ಮಾನವ ದೇಹದಲ್ಲಿ ರೋಗನಿರೋಧಕ ಶಕ್ತಿ ವರ್ಧಿಸುವ ಚಿಕಿತ್ಸೆಯನ್ನು ಸಂಶೋಧಿಸಿದ್ದರು.
ಪ್ರಶಸ್ತಿ ಮೊತ್ತ 7.39 ಕೋಟಿ ರೂ.ಗಳನ್ನು ಇಬ್ಬರು ವಿಜ್ಞಾನಿಗಳು ಜಂಟಿಯಾಗಿ ಹಂಚಿಕೊಳ್ಳಲಿದ್ದಾರೆ.
ಕ್ರಾಂತಿಕಾರಿ ಸಂಶೋಧನೆ: ಅಲಿಸನ್ ಹಾಗೂ ಹೊಂಜೋ ಅವರ ಸಂಶೋಧನೆಯ ಈ ಚಿಕಿತ್ಸಾ ವಿಧಾನ ಕ್ಯಾನ್ಸರ್ ವಿರುದ್ಧ ಕ್ರಾಂತಿಕಾರಕ ಪರಿಣಾಮ ಬೀರಲಿದೆ. 1990ರಲ್ಲಿ ಅಲಿಸನ್ ಹಾಗೂ 1992ರಲ್ಲಿ ಹೊಂಜೋ ಅವರು ಪ್ರತ್ಯೇಕವಾಗಿ ಸಂಶೋಧನೆ ಆರಂಭಿಸಿದ್ದರು. ಅವರ ಸಂಶೋಧನೆಯ ಚಿಕಿತ್ಸೆ ದೇಹದಲ್ಲಿ ಕ್ಯಾನ್ಸರ್ ಕಾರಕ ಅಂಶಗಳನ್ನು ಏರಿಸುವ ಕಣಗಳನ್ನು ನಿಯಂತ್ರಣದಲ್ಲಿಡುತ್ತದೆ. ಜತೆಗೆ ರೋಗನಿರೋಧಕಶಕ್ತಿಯನ್ನು ಕೂಡ ವೃದ್ಧಿಸುತ್ತದೆ. ಈ ಇಬ್ಬರು ವಿಜ್ಞಾನಿಗಳ ಸಂಶೋಧನೆಯು ಆಧುನಿಕ ವೈದ್ಯಕೀಯ ವಿಜ್ಞಾನಕ್ಕೆ ಬುನಾದಿಯಾಗಿದೆ. ಈ ಸಂಶೋಧನೆ ಆಧರಿಸಿ ಆಧುನಿಕ ಸುಧಾರಿತ ಚಿಕಿತ್ಸಾ ಕ್ರಮಗಳು ನಡೆಯುತ್ತಿವೆ. ಇದಕ್ಕೆ ಚೆಕ್​ಪಾಯಿಂಟ್ ಥೆರಪಿ ಅಥವಾ ಚೆಕ್​ಪಾಯಿಂಟ್ ಇನ್ಹಿಬಿಟರ್ಸ್ ಎಂದು ಕರೆಯಲಾಗುತ್ತದೆ.
ಈ ವಾರಪೂರ್ತಿ ವಿವಿಧ ಕ್ಷೇತ್ರಗಳ ಗಣ್ಯರಿಗೆ ನೊಬೆಲ್ ಪ್ರಶಸ್ತಿ ಘೋಷಣೆಯಾಗಲಿದೆ. ಮೊದಲ ಹಂತವಾಗಿ ವೈದ್ಯ ಕ್ಷೇತ್ರದಲ್ಲಿ ಘೋಷಿಸಲಾಗಿದೆ.
ಜೇಮ್್ಸ ಅಲಿಸನ್: 70 ವರ್ಷದ ಅಲಿಸನ್ ಅವರು ಅಮೆರಿಕದ ಎಂ.ಡಿ. ಆಂಡರ್ಸನ್ ಕ್ಯಾನ್ಸರ್ ಸಂಶೋಧನಾ ಕೇಂದ್ರದ ಮುಖ್ಯಸ್ಥರಾಗಿದ್ದಾರೆ. ಕಳೆದ 4 ದಶಕಗಳಿಂದ ಕ್ಯಾನ್ಸರ್ ವಿರುದ್ಧ ರೋಗನಿರೋ ಧಕ ಚಿಕಿತ್ಸೆಗೆ ಸಂಬಂಧಿಸಿದ ಸಂಶೋಧನೆಯಲ್ಲಿ ನಿರತರಾಗಿದ್ದಾರೆ.
ತಸುಕು ಹೊಂಜೋ: 76 ವರ್ಷದ ಹೊಂಜೋ ಅವರು ಜಪಾನ್​ನ ಕ್ಯೋಟೊ ವಿವಿಯಲ್ಲಿ ಪ್ರಾಧ್ಯಾಪಕರಾಗಿ ಕೆಲಸ ಮಾಡುತ್ತಿದ್ದಾರೆ.
ಈ ಪ್ರಶಸ್ತಿಯು ನನ್ನ ಸಂಶೋಧನೆಗೆ ಇನ್ನಷ್ಟು ಪ್ರೇರಣೆ ನೀಡಿದೆ. ಮನುಷ್ಯನ ಜೀವ ಉಳಿಸುವ ಕಾರ್ಯದಲ್ಲಿ ಸಂಶೋಧನೆ ಮುಂದುವರಿಸುತ್ತೇನೆ.
| ಜೇಮ್್ಸ ಅಲಿಸನ್
ಚೆಕ್​ಪಾಯಿಂಟ್ ಥೆರಪಿಗೆ ಸಂಬಂಧಿಸಿದ ಸುಧಾರಿತ ಸಂಶೋಧನೆ ಮಾಡುವುದು ನನ್ನ ಗುರಿ. ಈ ಮೂಲಕ ಇನ್ನಷ್ಟು ಕ್ಯಾನ್ಸರ್ ರೋಗಿಗಳಿಗೆ ಚಿಕಿತ್ಸೆ ಸಿಗುವಂತಾಗಬೇಕು.
| ತಸುಕು ಹೊಂಜೋ